Soumision dann prékarité samèm soufrans mon pèp
La tir son lavnir dan son min pou mié piétine son présan.
Kom i voudré anfons anou i done anou dann modernité pou voir, pou révé.
Mé i lèss anou dann bidon-lavil i koul an panié persé.
Nout kor an luil samèm siro pou sat i vé control mon pèp.
Plus nou lé atèr : plus li lé anlèr plus li plush anou !
In langageman pou di marmay lé pa kondané assiz dovan in boutik
Ou supli in boug politik pou in ti kontra pou in vi bankal.
In langageman pou di nou lé pa kondané anvoy tout marmay
Ek in pé linstriksion dan peï gouyav déor.
In langageman pou fé in gran plas pou li,
Pou li fé soutien famiy son pèp lé mavouz.
Tout sat lé bon anvoy déor !
Sat lé malade soign pa li !
Sat lé bon i vé rest isi arèt pèz ali atèr !
Asé bon pou viv partou su la tèr.
Mé pa asé bon pou viv é dévlop son péi.
Sufisaman malade pou port anlèr in bann profitèr (profit’ tèr)
In langageman pou remèt lespoir dann zié kréol !
In langageman pou éfass emprinte résignasion dan son min !
In langageman pou redone volonté kroir in ot destiné lé possib’!
In langageman pou mazin an rénioné é konstrui in manir viv an rénioné.
Mon gongon la soufrans mon pèp i renons !
Mon gongon lespoir kan rénioné i vé exist par li mèm !!
Introduction « Cahier du viv au péi natal »
ROBERT Bertrand
Aucun commentaire:
Enregistrer un commentaire